ວາລະສານອະລຸນໃໝ່ ຈັດຊຸດຝຶກອົບຮົມຄວາມຮູ້ພື້ນຖານການນຳໃຊ້ເວບໄຊ໋
ວາລະສານອະລຸນໃໝ່ ເອເລັກໂຕຼນິກເວີຊັນໃໝ່
ຊຸດຝຶກອົບຮົມຄວາມຮູ້ພື້ນຖານການນຳໃຊ້ເວບໄຊ໋ ວາລະສານອະລຸນໃໝ່ເອເລັກໂຕຼນິກເວີຊັນໃໝ່ ໄດ້ຈັດຂຶ້ນໃນລະຫວ່າງ ວັນທີ 8-10 ຕຸລາ 2025 ຢູ່ທີ່ສຳນັກງານຄະນະໂຄສະນາອົບຮົມສູນກາງພັກ (ໜອງບອນ) ພາຍໃຕ້ການເປັນປະທານຂອງ ທ່ານ ປອ ວັນລາຕີ ຄຳວານວົງສາ ກຳມະການຄະນະພັກ, ບັນນາທິການໃຫຍ່ ວາລະສານອະລຸນໃໝ່, ຊຸດຝຶກອົບຮົມໃນຄັ້ງນີ້ມີຜູ້ເຂົ້າຮ່ວມທັງໝົດ 17 ທ່ານ, ຍິງ 5 ທ່ານ.
ການຈັດຝຶກອົບຮົມໃນຄັ້ງນີ້ ເພື່ອຍົກລະດັບຄວາມຮູ້-ຄວາມສາມາດໃຫ້ແກ່ພະນັກງານລັດຖະກອນ ພາຍໃນວາລະສານອະລຸນໃໝ່ ໃນການນໍາໃຊ້ວາລະສານອະລຸນໃໝ່ເອເລັກໂຕຼນິກເວີຊັນໃໝ່. ການພັດທະນາ, ການອອກແບບຮູບພາບ, ຕັດຕໍ່ລົງໜ້າເວບໄຊ໋, ຮຽນຮູ້ເຕັກນິກຕ່າງໆ ແລະ ການເກັບກຳຂໍ້ມູນ ເພື່ອຮັບໃຊ້ໃນສື່ເອເລັກໂຕຼນິກ ແລະ ຮຽນຮູ້ລະບົບ AI (ປັນຍາປະດິດ) ທີ່ຕິດພັນກັບການເຄື່ອນໄຫວວຽກງານວຽກງານວິຊາສະເພາະໃຫ້ມີຄວາມສະດວກ, ວ່ອງໄວ ແລະ ມີປະສິດທິຜົນຍິ່ງຂຶ້ນ. ພ້ອມກັນນັ້ນ, ກໍເພື່ອເຮັດໃຫ້ພະນັກງານ, ລັດຖະກອນໄດ້ເຂົ້າເຖິງເຕັກໂນໂລຊີ ໂດຍສະເພາະແມ່ນການຄົ້ນຫາຂໍ້ມູນ, ການສ້າງຂໍ້ມູນແບບໃໝ່, ການຮຽນຮູ້ວຽກງານ, ການວາງແຜນ ແລະ ການແກ້ໄຂບັນຫາຕ່າງໆ, ການສື່ສານ, ວິທີການນໍາສະເໜີບົດແບບໃໝ່, ນໍາສະເໜີບົດຮຽນຕ່າງໆແບບອັດຕະໂນມັດ ນອກຈາກນີ້ກໍຍັງຮຽນຮູ້ກ່ຽວກັບການນຳໃຊ້ກ້ອງຖ່າຍຮູບເຂົ້າໃນການປະຕິບັດວຽກງານວິຊາສະເພາະ ໃຫ້ເກີດຜົນປະໂຫຍດສູງສຸດ.
ໃນໄລຍະການຝຶກອົບຮົມ ວິທະຍາກອນໄດ້ຖ່າຍທອດບົດຮຽນທາງດ້ານເຕັກໂນໂລຊີ, ມີການຄົ້ນຄວ້າສົນທະນາແລກປ່ຽນບົດຮຽນ, ປະສົບການເຊິ່ງກັນ ແລະ ກັນ ຖືເປັນການຍົກລະດັບຄວາມຮູ້, ເຕັກນິກໃໝ່ໆ, ການຝຶກອົບຮົມຄັ້ງນີ້ດຳເນີນດ້ວຍບັນຍາກາດຟົດຟື້ນ ແລະ ມີຜົນສໍາເລັດຢ່າງຈົບງາມ.