ພັກກອມມູນິດຫວຽດນາມ ໄດ້ສ້າງຕັ້ງຂຶ້ນໃນ ວັນທີ 3 ກຸມພາ 1930 ໂດຍແມ່ນ ປະທານ ໂຮ່ຈິມິນ ເປັນຜູ້ກໍ່ຕັ້ງ, ນໍາພາ ແລະ ຝຶກຝົນຫຼໍ່ຫຼອມໃຫ້ເຕີບໃຫຍ່ຂະຫຍາຍຕົວ. ພາຍຫຼັງຍາດໄດ້ໄຊຊະນະອັນຍິ່ງໃຫຍ່ໃນການປະຕິວັດເດືອນສິງຫາ ປີ 1945, ທັບມ້າງແອກປົກຄອງ ຂອງພວກລ່າເມືອງຂຶ້ນແບບເກົ່າ ແລະ ເຄິ່ງສັກດີນາ, ສະຖາປະນາປະເທດສາທາລະນະລັດ ປະຊາທິປະໄຕຫວຽດນາມ. ພັກກອມມູນິດຫວຽດນາມ ເປັນພັກດຽວກໍາອໍານາດ. ພັກກອມມູນິດຫວຽດນາມ ກໍາອໍານາດ, ນໍາພາການກໍ່ສ້າງສັງຄົມນິຍົມຢູ່ພາກເໜືອຫວຽດນາມ ແລະ ການຕໍ່ສູ້ປົດປ່ອຍພາກໃຕ້ຫວຽດນາມເຊິ່ງໄດ້ຮັບໄຊຊະນະຢ່າງສົມບູນ, ທ້ອນໂຮມປະເທດຊາດເອກະພາບ ໃນປີ 1975.
ປັດຈຸບັນ, ພັກກອມມູນິດຫວຽດນາມຍາດໄດ້ຜົນສໍາເລັດອັນໃຫຍ່ຫຼວງ ໃນການນໍາພາພາລະກິດກໍ່ສ້າງສັງຄົມນິຍົມຕາມແນວທາງປ່ຽນແປງໃໝ່, ພັດທະນາປະເທດຕາມທິດຫັນເປັນອຸດສະຫະກໍາ ແລະຫັນເປັນທັນສະໄໝ. ຜົນສໍາເລັດດັ່ງກ່າວນັ້ນ ໄດ້ຢັ້ງຢືນກໍາລັງແຮງບົ່ມຊ້ອນ, ຖານະບົດບາດ ແລະ ອິດທິພົນຕໍ່ສາກົນ. ພ້ອມກັນນັ້ນ, ກໍເປັນຫຼັກຖານຢັ້ງ ຢືນເຖິງບົດບາດນໍາພາ ແລະ ກໍາອໍານາດ ຂອງພັກກອມມູນິດຫວຽດນາມ. ຜ່ານຂະບວນວິວັດແຫ່ງການກໍາອໍານາດ ຂອງພັກກອມມູນິດຫວຽດນາມໄດ້ຊີ້ໃຫ້ເຫັນໄດ້ບົດ ຮຽນອັນສໍາຄັນຈໍານວນໜຶ່ງ ດັ່ງນີ້:
- ກ່ຽວກັບການກໍ່ສ້າງພັກທາງດ້ານການເມືອງ, ແນວຄິດ. ພັກກອມມູນິດຫວຽດນາມໄດ້ເອົາໃຈໃສ່ກໍ່ສ້າງ, ປັບປຸງແລະ ປົກປັກຮັກສາພື້ນຖານການເມືອງໃຫ້ມີຄວາມສະຫງົບ ແລະ ໝັ້ນຄົງ, ຍຶດໝັ້ນ ແລະ ກໍາແໜ້ນລັດທິມາກ-ເລນິນ, ແນວຄິດໂຮ່ຈິມິນ, ຄວາມເປັນເອກະລາດແຫ່ງຊາດ ແລະ ສັງຄົມນິຍົມ ເພື່ອຊີ້ນໍາທຸກການເຄື່ອນໄຫວປະຕິວັດ ຂອງພັກແມ່ນມີບົດບາດສໍາຄັນເປັນພິເສດຮັບປະກັນໄຊຊະນະຂອງການກໍ່ສ້າງສັງຄົມນິຍົມຢູ່ຫວຽດນາມ. ພັກຍາມໃດກໍເອົາໃຈໃສ່ການປ່ຽນແປງໃໝ່ ໃນການກໍານົດແນວທາງ ແລະ ຈັດຕັ້ງປະຕິບັດແນວທາງ, ແຜນນະໂຍບາຍຂອງພັກຢ່າງປະດິດສ້າງບົນພື້ນຖານລັດທິມາກ-ເລນິນແລະ ແນວຄິດໂຮ່ຈິມິນ, ພ້ອມທັງເພີ່ມເຕີມເສີມສ້າງບູລະນະໃຫ້ສົມບູນ ແລະ ໝູນໃຊ້ສອດຄ່ອງກັບພຶດຕິກໍາຕົວຈິງຂອງຫວຽດນາມ. ພັກກອມມູນິດຫວຽດນາມເປັນພັກມາກຊິດແທ້ຈິງ ດ້ວຍຄວາມເຕີບໃຫຍ່ດ້ານການເມືອງ, ແນວຄິດ, ມີລັກສະນະການຈັດຕັ້ງທີ່ເຂັ້ມງວດ, ສະດຸ້ງໄວ, ປະດິດສ້າງ ແລະ ຍຶດໝັ້ນລັດທິມາກ-ເລນິນ, ແນວຄິດໂຮ່ຈິມິນ. ພັກຍຶດໝັ້ນໃນທັດສະນະຂອງ ວ.ອ.ເລນິນ ທີ່ວ່າ “ບໍ່ມີຫຼັກໝັ້ນການເມືອງຖືກຕ້ອງ ແມ່ນຊົນຊັ້ນໃດໜຶ່ງບໍ່ອາດຈະຮັກສາໄດ້ອໍານາດການປົກຄອງຂອງຕົນເອງ”. ເພື່ອດໍາເນີນວຽກງານການເມືອງ, ແນວຄິດ ໃນການກໍ່ສ້າງພັກໃຫ້ມີປະສິດທິຜົນສູງກວ່າເກົ່າ, ຢັ້ງຢືນບົດບາດນໍາພາ, ກໍາອໍານາດຂອງຕົນນັ້ນ ພັກກອມມູນິດຫວຽດນາມ ບໍ່ວ່າເວລາໃດກໍໃຫ້ຄວາມສໍາຄັນຕໍ່ການປ່ຽນແປງໃໝ່ຈິນຕະ ນາການ, ສະຫຼຸບພຶດຕິກໍາ, ຮັບຮູ້ຢ່າງເລິກເຊິ່ງກ່ຽວກັບລັດທິສັງຄົມນິຍົມ, ເສັ້ນທາງກ້າວຂຶ້ນສັງຄົມນິຍົມ,ກ່ຽວກັບການກໍ່ສ້າງພັກ ແລະ ລະບົບການເມືອງ; ຕ້ານທ່າອ່ຽງແນວຄິດ ແລະ ທັດສະນະຜິດເຂວ, ປໍລະປັກ. ພິເສດ, ພັກຖືສໍາຄັນການຄົ້ນຄວ້າ ແລະ ໝູນໃຊ້ແນວຄິດ, ຄຸນສົມບັດ, ແບບແຜນໂຮ່ຈິມິນ, ຖືສໍາຄັນວຽກງານສຶກສາອົບຮົບ, ຝຶກຝົນຫຼໍ່ຫຼອມຄຸນທາດການເມືອງ ແລະ ຄວາມສາມາດ, ຄຸນສົມບັດ, ແບບ ແຜນດໍາລົງຊີວິດຂອງພະນັກງານ, ສະມາຊິກພັກ. ມີການລົງທຶນ ແລະ ປ່ຽນແປງໃໝ່ວຽກງານຄົ້ນຄວ້າທິດສະດີ, ເຮັດໃຫ້ບັນຫາເຄັ່ງຮ້ອນຕ່າງໆ ທີ່ສັງຄົມຕັ້ງຂຶ້ນຈະແຈ້ງ ແລະ ທັນການ.
ແຜນນະໂຍບາຍເສີມຂະຫຍາຍປະຊາທິປະໄຕ, ຍົກສູງລັັກສະນະວິທະຍາສາດ, ລັກສະນະຕົວຈິງແລະ ປະສິດທິຜົນຂອງວຽກງານໂຄສະນາ, ສຶກສາອົບຮົມ, ຄົ້ນຄວ້າວິທະຍາສາດ, ຄົ້ນຄວ້າ ແລະ ສະຫຼຸບພຶດຕິກໍາ, ຂະຫຍາຍທິດສະດີເຮັດໃຫ້ບັນຫາວຽກງານກໍ່ສ້າງພັກ (ພັກນໍາພາ ແລະ ກໍາອໍານາດຢູ່ຫວຽດ ນາມ) ມີຄວາມຈະແຈ້ງ).
ເພີ່ມທະວີວຽກງານສຶກສາອົບຮົມການເມືອງ, ແນວຄິດໃຫ້ພະນັກງານ, ສະມາຊິກພັກ ໂດຍຍູ້ແຮງການສຶກສາອົບຮົມ, ຝຶກຝົນຫຼໍ່ຫຼອມຄຸນສົມບັດປະຕິວັດ, ຮໍ່າຮຽນ ແລະ ປະຕິບັດຕາມແນວຄິດ, ຄຸນສົມບັດ, ແບບແຜນໂຮ່ຈິມິນຢ່າງແທ້ຈິງ; ພິເສດເອົາໃຈໃສ່ການເປັນແບບຢ່າງ ຂອງຜູ້ເປັນຫົວໜ້າຜູ້ທີ່ມີໜ້າທີ່ສໍາຄັນໃນບັນດາອົງການພັກ, ລັດ; ເດັດດ່ຽວຕໍ່ສູ້ຕ້ານບັນດາອິທິກໍາລັງປໍລະປັກ ຢ່າງມີປະສິດທິຜົນ, ເດັດດ່ຽວປົກປ້ອງພັກ ແລະ ປົກປ້ອງລະບອບການເມືອງ.
- 2. ຮັກສາ, ເພີ່ມທະວີການນໍາພາຂອງພັກໃນບັນດາຂົງເຂດຂອງຊີວິດສັງຄົມ, ພັກເປັນກອງນໍາໜ້າຂອງຊົນຊັ້ນກໍາມະກອນ, ປະຊາຊົນຜູ້ອອກແຮງງານ ແລະ ຂອງຊາດຫວຽດນາມ. ພັກກອມມູນິດຫວຽດ ນາມ ຍາມໃດກໍຢືນຢັນເຖິງບົດ ບາດນໍາພາຂອງພັກ ແລະ ເປັນກອງນໍາໜ້າຂອງຊົນຊັ້ນກໍາມະກອນຢ່າງແທ້ຈິງ. ເພີ່ມທະວີການນໍາພາຂອງພັກໃນບັນດາຂົງເຂດຂອງຊີວິດສັງຄົມ, ພັກເປັນກອງນໍາໜ້າຂອງຊົນຊັ້ນກໍາມະກອນ, ປະຊາຊົນຜູ້ອອກແຮງງານ ແລະ ຂອງຊາດຢ່າງແທ້ຈິງ ແມ່ນໜຶ່ງໃນບັນດາບົດຮຽນທີ່ພັກກອມມູນິດຫວຽດນາມໄດ້ສະຫຼຸບ ແລະ ຢືນຢັນ. ຮັກສາ ແລະ ເພີ່ມທະວີການນໍາພາຂອງພັກ ກໍແມ່ນການປົກປັກຮັກສາໝາກຜົນຂອງການປະຕິວັດ. ບົດຮຽນໃນພຶດຕິກໍາຈາກການພັງທະລາຍຂອງລະບອບສັງຄົມນິຍົມຢູ່ສະຫະພາບໂຊວຽດ ແລະ ບັນດາປະເທດເອີລົບຕາເວັນອອກ ໃຫ້ເຫັນອິທິກໍາລັງປໍລະປັກໃຊ້ກົນອຸບາເລຫຼ່ຽມຫຼາຍຢ່າງລົບລ້າງບົດບາດການນໍາພາຂອງພັກກອມມູນິດ, ປະຕິບັດຈຸດໝາຍເຮັດໃຫ້ລະບົບສັງ ຄົມນິຍົມພັງທະລາຍ. ບົດຮຽນຂອງພັກກອມມູນິດຫວຽດນາມໄດ້ຊີ້ໃຫ້ເຫັນວ່າ ການສືບຕໍ່ປ່ຽນແປງໃໝ່ເພື່ອຢັ້ງຢືນບົດບາດຂອງພັກ ບໍ່ແມ່ນພຽງບົດຮຽນສໍາລັບການກໍ່ສ້າງພັກເທົ່ານັ້ນ, ຫາກຍັງເປັນບົດຮຽນສໍາລັບພາລະກິດປະຕິວັດຂອງປະເທດເຮົາ. ຕ້ອງໄດ້ຢັ້ງຢືນວ່າ,ການປ່ຽນແປງໃໝ່ແມ່ນເລີ່ມຕົ້ນຈາກກາປ່ຽນແປງ ໃໝ່ພາຍໃນພັກ, ແຕ່ບໍ່ແມ່ນເຮັດໃຫ້ທາດແທ້ຂອງພັກປ່ຽນແປງ ຫາກຕ້ອງເຮັດໃຫ້ທາດແທ້ຊົນຊັ້ນກໍາມະ ກອນຂອງພັກ ແລະ ບົດບາດນໍາພາເດັດຂາດຂອງພັກ ໃນທຸກຂົງເຂດຂອງຊີວິດສັງຄົມ ຈະແຈ້ງກ່ວາເກົ່າ. ພັກນໍາພາພາລະກິດປ່ຽນແປງໃໝ່ສໍາເລັດຜົນ, ພັກຕ້ອງປ່ຽນແປງໃໝ່ຕົນເອງ, ລວມທັງການປ່ຽນແປງໃໝ່ເນື້ອໃນ ແລະ ແບບແຜນນໍາພາ. ພັກຕ້ອງກໍານົດແຈ້ງພາລະບົດບາດນໍາພາຂອງຕົນໃນເງື່ອນໄຂພັກກໍາອໍານາດ; ຖືສໍາຄັນວຽກງານທິດສະດີ, ແກ້ໄຂສະພາວະແຂງກະດ້າງ, ຄໍາພີ ຕາຍຕົວ, ສະຫຼຸບພຶດຕິກໍາ, ເພີ່ມເຕີມ, ບູລະນະແນວທາງການເມືອງຢ່າງທັນການ, ສ້າງເປັນພື້ນຖານຂອງຄວາມສາມັກຄີເປັນເອກະພາບທາງດ້ານແນວຄິດພາຍໃນພັກ ແລະ ໃນທົ່ວສັງຄົມ.
- 3. ຮັກສາລະບຽບວິໄນຢ່າງເຂັ້ມງວດ, ຢຶດໝັ້ນ ແລະ ປະຕິບັດຫຼັກການລວມສູນປະຊາທິປະໄຕ, ຫຼັກການຕິຊົມຕົນເອງ ແລະ ຕິຊົມກັນເປັນປະຈໍາ, ປົກປັກຮັກສາຄວາມສາມັກຄີເອກະພາບ, ປະຕິບັດລະບຽບວິໄນຂອງພັກ, ກົດໝາຍຂອງລັດຢ່າງເຂັ້ມງວດ; ເສີມຂະຫຍາຍປະຊາທິປະໄຕ, ເປີດເຜີຍໂປ່ງໃສ. ລວມສູນປະຊາທິປະໄຕ ແມ່ນຫຼັກການພື້ນຖານຊີ້ນໍາການກໍ່ສ້າງພັກທາງດ້ານການຈັດຕັ້ງ, ດໍາເນີນຊີວິດແລະ ການເຄື່ອນໄຫວຂອງພັກ ເປັນບັນຫາສໍາຄັນຮັບປະກັນໃຫ້ພັກມີຄວາມເຂັ້ມງວດດ້ານການຈັດຕັ້ງ, ມີຄວາມສາມັກຄີເປັນເອກະພາບ ແລະ ມີກໍາລັງແຮງຕໍ່ສູ້ຢ່າງແທ້ຈິງ. ບົນພື້ນຖານຍຶດໝັ້ນຫຼັກການລວມສູນປະຊາທິປະໄຕ ພັກກອມມູນິດຫວຽດນາມຈຶ່ງມີກໍາລັງແຮງ ແລະ ຄວາມສາມາດພຽງພໍໃນການຈັດຕັ້ງ, ນໍາພາປະຊາຊົນຜ່ານຜ່າຄວາມຫຍຸ້ງຍາກ, ສິ່ງທ້າທາຍທົດສອບນາໆປະການ, ຕໍ່ສູ້ພິລະອາດຫານ, ເດັດດ່ຽວໜຽວແໜ້ນ,ຮັບປະກັນໃຫ້ພັກ ຍາມໃດກໍເປັນກ້ອນກໍາລັງທີ່ເອກະພາບດ້ານມານະຈິດ ແລະ ການກະທໍາ. ຍົກສູງການຕິຊົມກັນ ແລະ ຕິຊົມຕົນເອງ, ເສີມຂະຫຍາຍບົດບາດ ແລະ ຄວາມເປັນແບບຢ່າງຂອງຖັນແຖວພະນັກງານ, ສະມາຊິກພັກໃນການປະຕິບັດໜ້າທີ່ ແລະ ຮັກສາຄຸນທາດການເມືອງ, ຄຸນສົມບັດ,
ແບບແຜນດໍາລົງຊີວິດ, ຍົກສູງຄວາມສາມາດນໍາພາ, ກໍາອໍານາດ ແລະ ກໍາລັງແຮງຕໍ່ສູ້ຂອງພັກ, ເຮັດໃຫ້ພັກເຂັ້ມແຂງສົມຄູ່ກັບໜ້າທີ່ການປະຕິວັດໃນໄລຍະໃໝ່. - 4. ພັກສ້າງສາຍພົວພັນສະໜິດແໜ້ນລະຫວ່າງພັກກັບປະຊາຊົນ. ພັກກອມມູນິດຫວຽດນາມ ໄດ້ຮຽນຮູ້ບົດຮຽນສໍາຄັນຈາກການປະຕິວັດເດືອນຕຸລາລັດເຊຍ, ເຊິ່ງສະແດງໃຫ້ເຫັນວ່າ ພັກໜຶ່ງທີ່ຍາມໃດ ກໍມີສາຍພົວພັນສະໜິດແໜ້ນກັບປະຊາຊົນ, ແມ່ນພັກນັ້ນເຮັດສໍາເລັດພາລະກໍາປະຫວັດສາດຂອງຕົນ. ເຊື່ອມຊຶມທິດສະດີ ກ.ມາກ, ຟ.ອັງແກນ ທີ່ວ່າ “ການປະຕິວັດແມ່ນພາລະກິດຂອງມະຫາຊົນ” ແລະບົດຮຽນພຶດຕິກໍາແຫ່ງການນໍາພາຂອງ ວ.ອ.ເລນິນ ຕໍ່ການປະຕິວັດເດືອນຕຸລາລັດເຊຍໄດ້ປະຕິບັດສໍາເລັດຈຸດໝາຍທີ່ວາງອອກ.
ພັກກອມມູນິດຍາມໃດ ກໍມີສາຍພົວພັນສະໜິດແໜ້ນກັບປະຊາຊົນ, ພ້ອມກັບປະຊາຊົນຍາດເອົາໄຊຊະນະຂອງການປະຕິວັດ. ພັກກໍາອໍານາດແມ່ນເພື່ອປະຕິບັດສິດເປັນເຈົ້າຂອງປະຊາຊົນ, ຮັບໃຊ້ປະຊາ ຊົນ. ຄວາມເຊື່ອໝັ້ນ, ການສະໜັບສະໜູນ, ຊ່ວຍເຫຼືອຂອງປະຊາຊົນເປັນແຫຼ່ງກໍາລັງແຮງຊະນະເລີດຂອງ
ພັກ. ການປຸກລຸກ, ຕື່ນຕົວ ແລະ ສະໜັບສະໜູນຂອງມວນມະຫາຊົນ ປະຊາຊົນຕໍ່ພັກ, ຕໍ່ແນວທາງຂອງພັກ ກໍແມ່ນການຮັບປະກັນໃຫ້ແກ່ໄຊຊະນະຂອງທຸກການປະຕິວັດ.
ຈາກບົດຮຽນພຶດຕິກໍາຂອງການປະຕິວັດເດືອນຕຸລາລັດເຊຍ, ປະຕິບັດຄຳສັ່ງສອນຂອງ ວ.ອ.ເລນິນແລະ ໂຮ່ຈິມິນ ຜູ້ຍິ່ງໃຫຍ່, ພັກກອມມູນິດຫວຽດນາມ ຍາມໃດກໍຖືສໍາຄັນບົດຮຽນ “ປະຊາຊົນເປັນກົກ”; ຍຶດຖືຄວາມເຊື່ອໝັ້ນຂອງປະຊາຊົນ ແລະ ສັງຄົມເປັນເງື່ອນໄຂຕັດສິນທໍາອິດ ເພື່ອກໍ່ສ້າງພັກ. ກໍ່ສ້າງ ແລະ ປັບປຸງການພົວພັນລະຫວ່າງພັກ, ລັດ ແລະ ປະຊາຊົນຢ່າງເປັນປົກກະຕິ; ເສີມຂະຫຍາຍບົດບາດແລະ ກໍາລັງແຮງ ຂອງປະຊາຊົນເຂົ້າຮ່ວມກໍ່ສ້າງພັກ; ກໍ່ສ້າງສະມາຊິກພັກໃຫ້ບໍລິສຸດສັດຊື່, ເຫັນແກ່ສ່ວນລວມ, ບໍ່ເຫັນແກ່ສ່ວນຕົວ, ສ້າງຄວາມເຊື່ອໝັ້ນ ຂອງປະຊາຊົນຕໍ່ພັກ ຢ່າງໜຽວແໜ້ນ.
ພັກກອມມູນິດຫວຽດນາມໃນປັດຈຸບັນ ຖືເອົາການຍູ້ແຮງການພັດທະນາເສດຖະກິດ, ແກ້ໄຂຊີວິການເປັນຢູ່ຂອງປະຊາຊົນ ເປັນປັດໄຈຕັດສິນຂອງການປັບປຸງສາຍພົວພັນລະຫວ່າງພັກກັບປະຊາຊົນ. ພັກກອມມູນິດຫວຽດນາມເອົາໃຈໃສ່ປະຕິບັດນະໂຍບາຍມະຫາສາມັກຄີທົ່ວປວງຊົນຢ່າງບໍ່ຢຸດຢັ້ງ, ດັດປັບຜົນປະໂຫຍດ, ແກ້ໄຂບັນດາຂໍ້ຂັດແຍ່ງພາຍໃນປະຊາຊົນຢ່າງທັນການ; ກໍ່ສ້າງບັນດາລະບອບລະບຽບການ, ຂໍ້ກໍານົດຕ່າງໆ ແນໃສ່ເປີດກວ້າງປະຊາທິປະໄຕ, ບູລະນະລະບອບປະຊາທິປະໄຕໂດຍກົງ ແລະ ປະຊາທິ ປະໄຕຕົວແທນ; ເສີມຂະຫຍາຍບົດບາດຂອງແນວໂຮມ ແລະ ບັນດາອົງການຈັດຕັ້ງສັງຄົມເຂົ້າຮ່ວມການ
ສ້າງແນວທາງ, ແຜນນະໂຍບາຍຂອງພັກ, ນະໂຍບາຍ, ກົດໝາຍຂອງລັດ. ຍົກສູງປະສິດທິຜົນການຕິດຕາມ ແລະ ຕີລາຄາຂອງສັງຄົມ.
- 5. ຕໍ່ສູ້ຕ້ານບັນດາທັດສະນະຜິດເຂວ, ປໍລະປັກ; ສະກັດກັ້ນ ແລະ ຕ້ານອາດຍາສິດ, ສໍ້ລາດບັງຫຼວງຢູ່ໃນຖັນແຖວພັກ ແລະ ກົງຈັກຄຸ້ມຄອງລັດ. ບົດຮຽນການກໍ່ສ້າງພັກກໍາອໍານາດຂອງພັກກອມມູນິດຫວຽດນາມ ສະແດງໃຫ້ເຫັນ ບໍ່ວ່າຍາມໃດ ພັກກໍໄດ້ຕໍ່ສູ້ກັບບັນດາທັດສະນະຜິດເຂວ, ປໍລະປັກ. ຕໍານິຕິຕຽນບັນດາທັດສະນະອັດຕະວິໄສ, ອະພິທໍາ, ປົກປ້ອງລັດທິມາກ-ເລນິນ, ໃນນັ້ນ ພັກໄດ້ອີງໃສ່ໂລກ
ກະທັດ, ວິທີວິທະຍາຂອງລັດທິມາກ-ເລນິນ ແລະ ຄວາມກ້າວໜ້າທາງດ້ານວິທະຍາສາດທໍາມະຊາດ ເພື່ອຊີ້ແຈງອະທິບາຍ, ພິສູດ, ຊີ້ໃຫ້ເຫັນບັນດາຄໍາກ່າວອ້າງຫຼອກລວງທີ່ບໍ່ມີບ່ອນອີງຂອງລັດທິອັດຕະນິຍົມ, ເຜີຍແບຄວາມຈໍາກັດຂອງວິທີຈິນຕະການອະພິທໍາທີ່ບັນດາອິດທິກໍາລັງຝືນປະຕິວັດໂຄສະນາ; ຊີ້ໃຫ້ເຫັນຄວາມຜິດພາດ, ບໍ່ມີບ່ອນອີງຂອງພວກເຂົາ ແລະ ຫຼັກຖານພິສູດຢ່າງມີວິທະຍາສາດກ່ຽວກັບທາດແທ້ອັນແທ້ຈິງຂອງລັດທິຈັກກະພັດ. ຈາກນັ້ນ ພັກກອມມູນິດຫວຽດນາມໄດ້ຢັ້ງຢືນລະບອບທຶນນິຍົມບໍ່ແມ່ນທາງເລືອກສໍາລັບປະຊາຊົນຫວຽດນາມ; ພັກກອມມູນິດຫວຽດນາມໄດ້ສະແດງທັດສະນະທ່າທີອັນເດັດຂາດ, ຫຼັກໝັ້ນທີ່ເດັດດ່ຽວໜຽວແໜ້ນ, ບໍ່ປະນິປະນອມຕໍ່ພວກທີ່ໂຄສະນາບິດເບືອນ, ໃສ່ຮ້າຍປ້າຍສີ, ປະຕິເສດລັດທິມາກ-ເລນິນ.
ກ່ຽວກັບການຕໍ່ສູ້ສະກັດກັ້ນ ແລະ ຕ້ານພະຍາດອາດຍາສິດ, ສໍ້ລາດບັງຫຼວງຢູ່ໃນພັກ ແລະ ກົງຈັກຄຸ້ມຄອງລັດ, ພັກກອມມູນິດຫວຽດນາມຍາມໃດກໍໄດ້ເນັ້ນໜັກເຖິງຄວາມສໍາຄັນເປັນພິເສດ ແລະ ຄວາມຫຍຸ້ງຍາກ, ສິ່ງທ້າທາຍທົດສອບຂອງໜ້າທີ່ກໍ່ສ້າງພັກ ແລະ ກໍ່ສ້າງ, ປັບປຸງ, ບູລະນະກົງຈັກອໍານາດການປົກຄອງລັດ ໂດຍແມ່ນພັກເປັນຜູ້ຮັບຜິດຊອບນໍາພາ.ນັ້ນແມ່ນຕ້ານພະຍາດອາດຍາສິດ, ສໍ້ໂກງ, ຮັບສິນບົນ ເຊິ່ງແມ່ນພະຍາດບໍ່ດີໃນອາດີດທີ່ຍັງຄົງຕົວ. ຕາມທັດສະນະຂອງພັກກອມມູນິດຫວຽດນາມ ກ່ຽວກັບສາເຫດຂອງມັນ ແມ່ນຍ້ອນລະດັບຕື່ນຕົວ, ສະຕິການຈັດຕັ້ງລະບຽບວິໄນຂອງບຸກຄົນພະນັກງານ,ສະມາ ຊິກພັກບໍ່ທັນເຂັ້ມແຂງ ເພື່ອຕ້ານທານຕໍ່ການຄຸກຄາມຂອງພະຍາດ, ກາຍເປັນຄົນອ່ອນແອ, ບໍ່ມີຄວາມສາ
ມາດຕ້ານທານຕໍ່ການຍົວະຍຸ. ພັກກອມມູນິດຫວຽດນາມ ໄດ້ຢືນຢັນຕາມທັດສະນະຂອງ ວ.ອ.ເລນິນ ທີ່ວ່າ “ບໍ່ມີໃຜຈະດັບສູນພວກເຮົາໄດ້, ນອກຈາກຄວາມຜິດພາດຂອງກະໂຕພວກເຮົາເອງ”.
ພັກກອມມູນິດຫວຽດນາມ ຍາມໃດ ກໍບໍ່ໄດ້ລົດລະການຕໍ່ສູ້ຕ້ານບັນດາທັດສະນະທີ່ຢາກຫຼຸດຕໍ່າ, ລົບລ້າງບົດບາດການນໍາພາ, ໄປເຖິງການດັບສູນພັກກອມມູນິດອອກຈາກຊີວິດການເມືອງຂອງປະເທດ. ອັນນັ້ນ ມັນຍິ່ງຕ້ອງຕໍ່ສູ້ຕ້ານບັນດາທັດສະນະຜິດເຂວ, ປໍລະປັກ ເພື່ອຢັ້ງຢືນບົດບາດຕັດສິນຂອງພັກຕໍ່ການປົກປັກຮັກສາອໍານາດການປົກຄອງລັດຂອງປະຊາຊົນ ແລະ ພາລະກິດປ່ຽນແປງໃໝ່ຕາມທິດສັງຄົມນິຍົມ.
- 6. ເພີ່ມທະວີການປ່ຽນແປງໃໝ່ຢ່າງແຂງແຮງວຽກງານພະນັກງານ. ສ້າງຖັນແຖວພະນັກງານ, ສະມາຊິກພັກທີ່ມີຄຸນນະພາບ, ມີຄຸນທາດ, ຄຸນສົມບັດ, ມີລະດັບຄວາມຮູ້-ຄວາມສາມາດພຽງພໍ; ສຸມໃສ່ກໍ່ສ້າງຖັນແຖວພະນັກງານຂັ້ນຍຸດທະສາດເປັນຄົນດີເດັ່ນອັນແທ້ຈິງໃນທຸກດ້ານ; ດ້ານຫຼັກໝັ້ນ, ຄຸນທາດການເມືອງ, ຄຸນສົມບັດ, ແບບແຜນດໍາລົງຊີວິດ, ຖືຜົນປະໂຫຍດຂອງພັກ, ປະເທດຊາດ ແລະ ປະຊາຊົນສູງກ່ວາອື່ນໝົດ, ສາມັກຄີ, ເຕົ້າໂຮມກໍາລັງແຮງປະຕິບັດໜ້າທີ່ການເມືອງ, ມີວິໄສທັດ ແລະ ຈິນຕະນາ ການຍຸດທະສາດ. ພ້ອມກັນນັ້ນ, ເພີ່ມທະວີວຽກງານຄຸ້ມຄອງຖັນແຖວພະນັກງານ, ເຂັ້ມງວດດ້ານລະບຽບວິໄນພາຍໃນພັກ ແລະ ກົດໝາຍຂອງລັດ; ສະກັດກັ້ນການເສື່ອມຄຸນ, ປ່ຽນທາດ ແລະ ກໍາຈັດພວກສວຍໂອກາດ, ສໍ້ລາດບັງຫຼວງອອກຈາກຖັນແຖວຂອງພັກ.
- 7. ເພີ່ມທະວີວຽກງານຕິດຕາມກວດກາ, ການປະຕິບັດມະຕິ, ຂໍ້ກໍານົດກົດລະບຽບຂອງພັກ, ກົດ ໝາຍຂອງລັດ; ສ້າງກົນໄກຄວບຄຸມສິດອໍານາດ, ເສີມຂະຫຍາຍບົດບາດຕິດຕາມ, ກວດກາຕີລາຄາທຸກການເຄື່ອນໄຫວສັງຄົມ ຂອງແນວໂຮມແຫ່ງຊາດ, ບັນດາການຈັດຕັ້ງການເມືອງ–ສັງຄົມ, ບັນດາອົງການສື່ມວນຊົນຢ່າງແຂງແຮງ. ພັກກອມມູນິດຫວຽດນາມ ພວມສືບຕໍ່ປຸກລະດົມການກໍ່ສ້າງ, ປັບປຸງພັກ, ຖືວຽກ
ງານນີ້ ເປັນໜ້າທີ່ກວມລວມອັນໜຶ່ງດ້ວຍຄວາມຕັດສິນໃຈສູງ ແລະ ບຸກບືນກວ່າເກົ່າ ເພື່ອສ້າງການຫັນ ປ່ຽນພື້ນຖານຢູ່ພາຍໃນພັກນັບທັງການເມືອງ, ແນວຄິດ, ຄຸນສົມບັດ, ການຈັດຕັ້ງ ແລະ ພະນັກງານ. ພັກກອມມູນິດຫວຽດນາມໄດ້ຢັ້ງຢືນຢ່າງຈະແຈ້ງ: “ກ້າວຂຶ້ນສັງຄົມນິຍົມ ແມ່ນຄວາມມຸ່ງມາດປາຖະໜາອັນແຮງ
ກ້າຂອງປະຊາຊົນ, ແມ່ນການເລືອກເອົາຢ່າງຖືກຕ້ອງຂອງພັກກອມມູນິດຫວຽດນາມ ແລະ ປະທານໂຮ່ຈິມິນ, ສອດຄ່ອງກັບທ່າອ່ຽງຂະຫຍາຍຕົວຂອງປະຫວັັດສາດ”[1] ນັ້ນແມ່ນການເລືອກເອົາຢ່າງຖືກຕ້ອງ ເພື່ອບັນລຸຜົນສໍາເລັດທີ່ມີຄວາມໝາຍປະຫວັດສາດ ແມ່ນການເສຍສະຫຼະເລືອດເນື້ອເຫື່ອແຮງບໍ່ຈັກເທົ່າໃດຮຸ່ນ
ຄົນ. ພັກຕ້ອງໄດ້ຢັ້ງຢືນຄວາມສໍາເລັດຂອງພາລະກິດປ່ຽນແປງໃໝ່ໂດຍແມ່ນ “ພັກກອມມູນິດຫວຽດນາມລິເລີ່ມ, ນໍາພາ ນໍາເອົາປະເທດຊາດຫວຽດນາມໄປເຖິງໄຊຊະນະ, ນໍາເອົາຊີວິດການເປັນຢູ່ກິນອີ່ມນຸ່ງອຸ່ນ, ມີຄວາມຜາສຸກມາໃຫ້ປະຊາຊົນ. ພ້ອມກັນນັ້ນ ພັກຕ້ອງເດັດດ່ຽວຕໍ່ສູ້, ສະກັດກັ້ນ, ຕີຖອຍການຖົດຖອຍດ້ານແນວຄິດການເມືອງ, ຄຸນສົມບັດ, ແບບແຜນດໍາລົງຊີວິດ, ບັນດາປະກົດການ “ຫັນປ່ຽນດ້ວຍຕົນ
ເອງ”, “ປ່ຽນທາດດ້ວຍຕົນເອງ”[2] ການຖົດຖອຍດ້ານແນວຄິດການເມືອງ, ຄຸນສົມບັດ, ແບບແຜນດໍາລົງຊີວິດຂອງພະນັກງານ, ສະມາຊິກພັກຈໍານວນໜຶ່ງໃນປັດຈຸບັນ ເປັນບັນຫາຮີບດ່ວນໃນຫາງສຽງສັງຄົມ. ມັນເຮັດໃຫ້ປະຊາຊົນເປັນຫ່ວງເປັນໄຍ, ບໍ່ພໍໃຈ, ມີຜົນສະທ້ອນບໍ່ດີເຖິງຄວາມເຊື່ອໝັ້ນຕໍ່ການນໍາພາຂອງພັກ,
ເຖິງການປະຕິບັດແນວທາງ, ແຜນນະໂຍບາຍຂອງພັກ, ນະໂຍບາຍ, ກົດໝາຍຂອງລັດ.
ເພື່ອສືບຕໍ່ຮັກສາບົດບາດນໍາໜ້າ, ຢັ້ງຢືນຄວາມສາມາດນໍາພາ, ພາປະຊາຊົນໄປເຖິງຈຸດໝາຍທີ່ກໍານົດໄວ້ໂດຍໄວນັ້ນ, ພັກກອມມູນິດຫວຽດນາມ ໄດ້ຢືນຢັນ ແມ່ນຕ້ອງອອກແຮງກໍ່ສ້າງ ແລະ ປັບປຸງພັກໃນທຸກດ້ານ. ຈົງຮັກພັກດີ, ປົກປ້ອງ ແລະ ຂະຫຍາຍລັດທິມາກ-ເລນິນ, ແນວຄິດໂຮ່ຈິມິນ, ປະຕິບັດມະຕິກອງປະຊຸມໃຫຍ່ຂອງພັກ ດ້ວຍການເນັ້ນໜັັກໃຫ້ບັນດາອົງການຈັດຕັ້ງພັກແຕ່ສູນກາງເຖິງບັນດາທ້ອງຖິ່ນ, ຂະແໜງການ ຕ້ອງວາງມາດຕະການໃຫ້ແທດຕົວຈິງ, ລະອຽດເປັນຮູບປະທໍາ, ມີຄວາມອາດສາມາດເປັນໄປໄດ້ໃນທາງປະຕິບັດ ແນໃສ່ດັດແປງຄືນໃໝ່ວຽກງານທີ່ເປັນກຸນແຈ, ມີຄວາມໝາຍເປັນຕາຍນັ້ນແມ່ນວຽກງານກໍ່ສ້າງພັກ ນັບທັງດ້ານການເມືອງ, ແນວຄິດ, ຄຸນສົມບັດ, ການຈັດຕັ້ງ ແລະ ພະນັກ
ງານ. ວຽກງານກໍ່ສ້າງພັກຕ້ອງຖືການປ້ອງກັນ ເພື່ອບໍ່ໃຫ້ເກີດການສໍ້ລາດບັງຫຼວງໃນວຽກງານພະນັກງານເປັນເນື້ອໃນທີ່ມີຄວາມໝາຍຕັດສິນເພື່ອປະຕິບັດຈຸດໝາຍປະຊາຊົນຮັ່ງມີຜາສຸກ, ປະເທດຊາດມັ່ງຄັ່ງເຂັ້ມ ແຂງ, ສັງຄົມຍຸຕິທໍາ, ປະຊາທິປະໄຕ, ສີວິໄລ ໃນຕະຫຼອດໄລຍະຍູ້ແຮງການຫັນປະເທດຫວຽດນາມເປັນ
ປະເທດອຸດສະຫະກໍາ ແລະ ທັນສະໄໝ, ເພີ່ມທະວີການເຊື່ອມໂຍງສາກົນ, ພັດທະນາປະເທດຫວຽດນາມຕາມທິດສັງຄົມນິຍົມ.
ບົດຮຽນການກໍ່ສ້າງພັກກໍາອໍານາດ ຂອງພັກກອມມູນິດຫວຽດນາມ ແມ່ນໄດ້ສະແດງໃຫ້ເຫັນໃນການໝູນໃຊ້ຢ່າງປະດິດສ້າງບັນດາຫຼັກມູນພື້ນຖານກ່ຽວກັບການກໍ່ສ້າງພັກແບບໃໝ່ ຂອງຊົນຊັ້ນກໍາມະ ກອນ ກໍຄືການໝູນໃຊ້ຢ່າງປະດິດສ້າງແນວຄິດໂຮ່ຈິມິນ ເຂົ້າໃສ່ເງື່ອນໄຂສະພາບຕົວຈິງຂອງວຽກງານ. ພ້ອມກັນນັ້ນ, ຍັງເອົາໃຈໃສ່ ແລະ ຮັບຮູ້ສະພາບເລັ່ງທວງ ກໍຄືໄພອັນຕະລາຍຕໍ່ຄວາມໝັ້ນຄົງຍືນຍົງຂອງພັກກໍາອໍານາດ ແລະ ມີຄວາມຕັດສິນໃຈບຸກທະລຸໃນການແກ້ໄຂບັນດາບັນຫາເລັ່ງທວງດັ່ງກ່າວ ຢ່າງມີຄວາມຮັບຜິດຊອບ./.
[1] ພັກກອມມູນິດຫວຽດນາມ: ເອກະສານກອງປະຊຸມໃຫຍ່ຄັ້ງທີ XI, ສຳນັກພິມຈຳໜ່າຍການເມືອງແຫ່ງຊາດຊຶເທິດ, ຮ່າໂນ້ຍ, ປີ 2011, ໜ້າ 70 (ພາສາຫວຽດນາມ).
[2] ພັກກອມມູນິດຫວຽດນາມ: ເອກະສານກອງປະຊຸມໃຫຍ່ຄັ້ງທີ XIII, ສຳນັກພິມຈຳໜ່າຍການເມືອງແຫ່ງຊາດຊຶເທິດ, ຮ່າໂນ້ຍ, ປີ 2021, ໜ້າ 163-164 (ພາສາຫວຽດນາມ).
ຮຽບຮຽງ: ສຸກສະຫວາດ ຈິດລະພົນ
(ວາລະສານອະລຸນໃໝ່ ສະບັບປະຈຳເດືອນມີນາ ປີ 2025)