ປັບປຸງກົນໄກການພັດທະນາໃຫ້ສົມບູນແບບ ມີຄວາມຈຳເປັນສຳລັບພັກປະຊາຊົນປະຕິວັດລາວໃນເງື່ອນໄຂໃໝ່ ຍ້ອນວ່າ ກົນໄກໃນການພັດທະນາກວມເອົາຫຼາຍຂົງເຂດ, ແຕ່ລະຂົງເຂດກໍມີຈຸດພິເສດສະເພາະ ແລະ ມີແຜນນະ
ໂຍບາຍໃນການຈັດຕັ້ງປະຕິບັດທີ່ເປັນເອກະລັກທີ່ແຕກຕ່າງກັນ. ກົນໄກການພັດທະນາສົມບູນແບບ ເປັນການສ້າງຄວາມເປັນລະບົບໃນການພັດທະນາແບບປະດິດສ້າງໃໝ່ ແມ່ນເສັ້ນທາງກ້າວໄປສູ່ອັນໃໝ່, ການປະດິດສ້າງໃໝ່ທີ່ມີປະສິດທິຜົນ ແລະ ນໍາເອົາຄຸນຄ່າໃໝ່, ຜົນປະໂຫຍດໃໝ່ມາໃຫ້ແກ່ສັງຄົມ.
ກົນໄກພັດທະນາທີ່ສົມບູນແບບ ມີຄວາມຈຳເປັນສຳລັບການພັດທະນາທີ່ມີຄຸນນະພາບສູງ, ເປັນການຍົກລະດັບຂີດຄວາມສາມາດໃນການພັດທະນານັບທັງດ້ານທິດສະດີ, ສະຕິປັນຍາ, ຫົວຄິດປະດິດສ້າງ ແລະ ພຶດຕິກຳ ທີ່ມີີຊີວິດ
ຊີວາ, ເປັນການພັດທະນາທີ່ວອ່ງໄວກວ່າ ແລະ ມີປະສິດທິຜົນກວ່າ. ກົນໄກການພັດທະນາສົມບູນແບບ ຈະປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ ນຳເອົາຄວາມຮັ່ງມີເຂັ້ມແຂງມາສູ່ປະຊາຊົນ ແລະ ປະເທດຊາດ.
ພັກປະຊາຊົນປະຕິວັດລາວ ໄດ້ມີບົດຮຽນໃນການປັບປຸງກົນໄກພັດທະນາປະເທດຊາດ ນັບແຕ່ປີ 1986 ເປັນຕົ້ນມາ, ໃນໄລຍະປ່ຽນແປງໃໝ່ນີ້ ພັກປະຊາຊົນປະຕິວັດລາວ ກໍຄືປະທານ ໄກສອນ ພົມວິຫານ ໄດ້ນຳສະເໜີຮູບແບບກົນໄກພັດທະນາແບບໃໝ່ ເຊິ່ງສະແດງອອກໃນການສ້າງກົນໄກຄຸ້ມຄອງເສດຖະກິດໃໝ່ ຄ່ອຍໆລົບລ້າງກົນໄກຄຸ້ມຄອງແບບ
ລວມສູນອາດຍາສິດ, ບໍລິຫານເກື້ອກູນ ຫັນມາປະຕິບັດການຄຸ້ມຄອງແບບໄລ່ລຽງທຸລະກິດສັງຄົມນິຍົມ; ພ້ອມນີ້ ຍັງໄດ້ເນັ້ນໜັກການກໍ່ສ້າງການພົວພັນການຜະລິດໃໝ່ສັງຄົມນິຍົມ; ກໍ່ສ້າງວັດທະນະທຳໃໝ່ ແລະ ຄົນໃໝ່ສັງຄົມນິຍົມ; ກໍ່ສ້າງລະບົບຄຸ້ມຄອງໃໝ່ຕໍ່ທຸກຂົງເຂດເຄື່ອນໄຫວຂອງສັງຄົມ. ນັບແຕ່ນັ້ນມາ ກົນໄກໃນການພັດທະນາປະເທດຊາດໃນແຕ່ລະຂົງເຂດ ໄດ້ມີການຫັນປ່ຽນໄປສູ່ຄຸນນະພາບ ແລະ ມີຄວາມອຸດົມສົມບູນໃນທາງປະຕິບັດ. ມະຕິກອງປະຊຸມໃຫຍ່ ຄັ້ງທີ IV ຂອງພັກປະຊາຊົນປະຕິວັດລາວ ໄດ້ເນັ້ນໜັກກ່ຽວກັບການປັບປຸງກົນໄກພັດທະນາໃໝ່ ວ່າ: “ພັກຕ້ອງປ່ຽນແປງໃໝ່ຈິນຕະ ນາການທາງດ້ານທິດສະດີ, ແກ້ໄຂສະພາວະຮັກສາເດີມ, ສະງັກຊັກຊ້າ, ຍົກສູງຈິດໃຈເອກະລາດ ເປັນເຈົ້າຕົນເອງ, ຍົກສູງລະດັບຄວາມສາມາດໃນການນຳພາ, ສ້າງບາດກ້າວຫັນປ່ຽນທີ່ແທ້ຈິງ ແລະ ນຳເອົາປະເທດຊາດກ້າວຂຶ້ນ”. ໃນໄລຍະ ໃໝ່, ພັກຮັບຮູ້ແຈ້ງກ່ຽວກັບກົນໄກພັດທະນາໃນຍຸກຫັນເປັນທັນສະໄໝ ແລະ ຮັບຮູ້ທິດທາງ, ໜ້າທີ່ຂອງພັກໃນຍຸກສະ
ໄໝໃໝ່ ເຊິ່ງສະແດງອອກໃນມະຕິກອງປະຊຸມໃຫຍ່ ຄັ້ງທີ XI ທີ່ວ່າ: “ສືບຕໍ່ບູລະນະລະບອບປະຊາທິປະໄຕປະຊາຊົນ ໃຫ້ສົມບູນຍິ່ງຂຶ້ນ, ສ້າງການຫັນປ່ຽນແຂງແຮງ, ເລິກເຊິ່ງ ແລະ ຮອບດ້ານ”. ໃນນີ້ ໄດ້ເນັ້ນໃຫ້ມີການພັດທະນາ
ໃໝ່ໃນການບູລະນະລະບົບການເມືອງທີ່ພັກເປັນແກນນຳໃຫ້ມີຄວາມເຂັ້ມແຂງ, ຮັບປະກັນໃຫ້ການເມືອງມີສະຖຽນລະພາບຢ່າງໜັກແໜ້ນ, ຄວາມສາມາດທ່າແຮງບົ່ມຊ້ອນຂອງຊາດ ໄດ້ຮັບການພັດທະນາເປັນບັນດາຂະແໜງຜະລິດ ແລະ ບໍລິ ການປາຍແຫຼມ ຕິດພັນກັບຫັນເປັນອຸດສາຫະກຳ ແລະ ທັນສະໄໝ ແລະ ຮັບປະກັນການພັດທະນາແບບສີຂຽວ ແລະ
ຍືນຍົງ; ໃນຂົງເຂດເສດຖະກິດ ພັກປະຊາຊົນ ປະຕິວັດລາວ ມີຄວາມສະດຸ້ງໄວ ໃນການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດການເງິນ ດ້ວຍການອອກມະຕິເລກທີ 04/ກມສພ ວ່າດ້ວຍການສ້າງເສດຖະກິດເອກະລາດ ເປັນເຈົ້າຕົນເອງໃນໄລຍະໃໝ່ ແລະ ອອກມະຕິ 05/ຄລສພ ຂອງຄະນະບໍລິຫານງານສູນກາງພັກວ່າດ້ວຍ ຜັນຂະຫຍາຍແນວທາງ
ປ່ຽນແປງໃໝ່ເຂົ້າສູ່ລວງເລິກ ດ້ວຍການສ້າງການຫັນປ່ຽນຢ່າງແຂງແຮງ ເລິກເຊິ່ງ ແລະ ຮອບດ້ານ, ໃນນີ້ ໄດ້ເນັ້ນວ່າ: “ສືບຕໍ່ສ້າງເສດຖະກິດຕະຫຼາດຕາມທິດສັງຄົມນິຍົມທີ່ມີການນຳພາຂອງພັກ, ການຄຸ້ມຄອງ-ດັດສົມຂອງລັດ, ເຄົາລົບ ແລະ ປະຕິບັດກົດເກນຂອງເສດຖະກິດຕະຫຼາດຢ່າງຖືກຕ້ອງ; ພັດທະນາເສດຖະກິດເປັນເຈົ້າຕົນເອງ, ເພິ່ງຕົນເອງ, ສ້າງຄວາມເຂັ້ມແຂງດ້ວຍຕົນເອງ ໃຫ້ເປັນຮູບປະທຳຫຼາຍຂຶ້ນທັງຢູ່ສູນກາງ ແລະ ທ້ອງຖິ່ນ”.
ການປັບປຸງກົນໄກພັດທະນາໃຫ້ສົມບູນແບບໃນເງື່ອນໄຂໃໝ່ ຮຽກຮ້ອງຕ້ອງມີຫຼັກການທີ່ສອດຄ່ອງ, ພັກປະຊາຊົນປະຕິວັດລາວໄດ້ຍຶດໝັ້ນບາງຫຼັກການໃນການພັດທະນາ ດັ່ງນີ້:
– ຍຶດໝັ້ນອຸດົມການສັງຄົມນິຍົມຢ່າງໜັກແໜ້ນ ແລະ ໝູນໃຊ້ລັດທິມາກ-ເລນິນ, ແນວຄິດ ໄກສອນ ພົມວິຫານ ແລະ ມູນເຊື້ອອັນດີງາມຂອງພັກຂອງຊາດ ແລະ ຈຸດພິເສດຂອງລາວ ຢ່າງມີຫົວຄິດປະດິດສ້າງ ແລະ ສອດຄ່ອງ
ກັບຕົວຈິງ.
– ຍຶດໝັ້ນການນຳພາເດັດຂາດ, ໂດຍກົງ, ຮອບດ້ານຂອງພັກ, ກຳແໜ້ນທັດສະນະຂອງພັກ ແລະ ຍຶດໝັ້ນໃນອັນທີ່ເປັນຫຼັກການ, ທັງຕ້ອງປະດິດສ້າງ, ຕໍ່ຍອດ, ເສີມຂະຫຍາຍ ແລະ ມີການບຸກທະລຸຢ່າງແຂງແຮງໃນເງື່ອນໄຂສະພາບການໃໝ່, ຖືການພັດທະນາປະເທດຊາດ ເປັນພາລະກິດປະຕິວັດອັນເລິກເຊິ່ງ ຕ້ອງດຳເນີນການຢ່າງຍາວນນານ, ຕໍ່ເນື່ອງ. ຍູ້ແຮງປ່ຽນແປງໃໝ່ ດ້ວຍການດຳເນີນໄປຢ່າງຮອບຄອບ, ທັງມີການຕັດສິນໃຈເດັດດ່ຽວ, ໜຽວແໜ້ນ ໂດຍນຳໃຊ້ບັນດາຮູບການ, ວິທີການ, ມາດຕະການແລະ ຂັ້ນຕອນທີ່ເໝາະສົມ, ບໍ່ອັດຕະວິໄສ, ຕ້ອງຮຽນຮູ້ຮັບເອົາອັນໃໝ່ຢ່າງມີການເລືອກ
ເຟັ້ນ ແລະ ປະດິດສ້າງ.
– ຢືດໝັ້ນຫຼັກການພັກນຳພາ, ກຳອຳນາດຕາມກົດໝາຍ, ຍົກສູງປະສິດທິພາບໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ຕາມທິດສ້າງລັດທີ່ປົກຄອງດ້ວຍກົດໝາຍຂອງປະຊາຊົນ ໂດຍປະຊາຊົນ ເພື່ອປະຊາຊົນ ພາຍໃຕ້
ການນຳພາຂອງພັກ.
– ຍຶດໝັ້ນຫຼັກການຖືປະຊາຊົນເປັນກົກ, ທຸກໆແນວທາງ, ນະໂຍບາຍຕ້ອງເລີ່ມຈາກຄວາມຮຽກຮ້ອງຕ້ອງການ, ຄວາມມຸ່ງມາດປາຖະໜາ ແລະ ສິດຜົນປະໂຫຍດອັນຊອບທຳຂອງປະຊາຊົນຢ່າງແທ້ຈິງ; ຮັດແໜ້ນສາຍພົວພັນອັນສະໜິດສະໜົມກັບປະຊາຊົນ, ອີງໃສ່ປະຊາຊົນ ເພື່ອສ້າງສາ ແລະ ພັດທະນາປະເທດຊາດ; ປັບປຸງ ແລະ ເພີ່ມທະວີຄວາມເຊື່ອ
ໝັ້ນຂອງປະຊາຊົນຕໍ່ກັບພັກ, ລັດ, ລະບອບສັງຄົມນິຍົມ.
ການປັບປຸງກົນໄກການພັດທະນາໃຫ້ສົມບູນແບບ ແມ່ນຄວາມຮຽກຮ້ອງຕ້ອງການຂອງພັກ; ຈຸດປະສົງລະດັບຄາດ
ໝາຍຂອງການພັດທະນາປະເທດຊາດໃນໄລຍະໃໝ່ນີ້ ແມ່ນກວມເອົາຫຼາຍຂົງເຂດ. ສຳລັບການພັດທະນາເສດຖະກິດຕະຫຼາດຕາມທິດສັງຄົມນິຍົມ ເປັນການເສີມຂະຫຍາຍບົດບາດ ແລະ ກຳລັງແຮງຂອງບັນດາພາກສ່ວນເສດຖະກິດຢ່າງ
ແຂງແຮງ, ຮັບຮູ້ແຈ້ງຄຸນລັກສະນະເສດຖະກິດຕະຫຼາດຕາມທິດສັງຄົມນິຍົມຂອງ ສປປ ລາວ, ແມ່ນຮູບແບບການຈັດຕັ້ງເສດຖະກິດບົນພື້ນຖານຫຼັກການ ແລະ ປະຕິບັດບັນດາກົດເກນຂອງເສດຖະກິດຕະຫຼາດ, ດ້ວຍຫຼາຍຮູບແບບກໍາມະສິດ, ຫຼາຍພາກສ່ວນເສດຖະກິດ, ຫຼາຍຮູບແບບວິສາຫະກິດ, ເຄື່ອນໄຫວຕາມກົນໄກຕະຫຼາດ, ມີການຄຸ້ມຄອງ, ດັດສົມຂອງລັດ, ຮັບປະກັນໄປຕາມທິດສັງຄົມນິຍົມ ພາຍໃຕ້ການນໍາພາຂອງພັກ.
ລະດັບຄາດໝາຍດ້ານກົນໄກການລົງທຶນທີ່ມີຄຸນນະພາບ, ຍືນຍົງ ແລະ ສີຂຽວ ແມ່ນປັບປຸງສະພາບແວດລ້ອມການ ດໍາເນີນທຸລະກິດ ສ້າງຄວາມໄວ້ເນື້ອເຊື່ອໃຈໃຫ້ແກ່ນັກລົງທຶນພາຍໃນ ແລະ ຕ່າງປະເທດ, ອັນພົ້ນເດັ່ນແມ່ນການສ້າງຍຸດທະສາດແຫ່ງຊາດວ່າດ້ວຍການບໍລິການຂອງລັດຜ່ານປະຕູດຽວ, ຊຸກຍູ້ ແລະ ສ້າງຄວາມເຂັ້ມແຂງວຽກງານບໍລິການ
ຜ່ານປະຕູດຽວໃຫ້ບັນດາແຂວງ, ປັບປຸງກົນໄກຄຸ້ມຄອງການລົງທຶນຂອງພາຍໃນ ແລະ ຕ່າງປະເທດ ໃຫ້ສອດຄ່ອງກວ່າເກົ່າ, ເອົາໃຈໃສ່ປັບປຸງກົດໝາຍ ແລະ ນິຕິກຳລຸ່ມກົດໝາຍໃຫ້ເປັນລະບົບຄົບຊຸດ.
ລະດັບຄາດໝາຍໃນການປັບປຸງກົນໄກການເຊື່ອມໂຍງ, ເຊື່ອມຈອດຂອງ ສປປ ລາວ ໃນພາກພື້ນ ແລະ ສາກົນ ແມ່ນສ້າງການຫັນປ່ຽນໃນການພັດທະນາໂຄງລ່າງພື້ນຖານທີ່ສາມາດເຊື່ອມຈອດ-ເຊື່ອມໂຍງພາຍໃນ, ພາກພື້ນ ແລະ ສາ ກົນ ເພື່ອເອື້ອອຳນວຍໃຫ້ແກ່ການຜະລິດ, ບໍລິການ, ການຄ້າ, ການລົງທຶນນັບມື້ນັບຂະຫຍາຍຕົວຍິ່ງຂຶ້ນ.
ໃນເງື່ອນໄຂໃໝ່, ວິທະຍາສາດເຕັກໂນໂລຊີກ້າວໜ້າຂະຫຍາຍຕົວຢ່າງກ້າວກະໂດດຄືປັດຈຸບັນ, ມີຫຼາຍບັນຫາໃໝ່ໃນສັງຄົມເກີດຂຶ້ນ ຮຽກຮ້ອງເຖິງຄຸນນະພາບການພັດທະນາໃນຍຸກໃໝ່ທີ່ດີກວ່າ; ພັກປະຊາຊົນປະຕິວັດລາວ ມີຄວາມສະດຸ້ງໄວ ດ້ວຍການດຳເນີນແຜນນະໂຍາຍສ້າງການຫັນປ່ຽນຢ່າງແຂງແຮງ, ເລິກເຊິ່ງ, ຮອບດ້ານໃນການປັບປຸງກົນໄກການພັດທະນາໃຫ້ສົມບູນແບບ ດັ່ງນີ້:
1). ສືບຕໍ່ຍຶດໝັ້ນນະໂຍບາຍພັດທະນາເສດຖະກິດຕະຫຼາດຕາມທິດສັງຄົມນິຍົມ ໃຫ້ມີຄຸນນະພາບ ແລະ ສົມບູນແບບ ໂດຍເລີ່ມຈາກການຍົກສູງຄວາມຮັບຮູ້ກ່ຽວກັບເສດຖະກິດຕະຫຼາດຕາມທິດສັງຄົມນິຍົມ ແມ່ນຕົວແບບເສດຖະກິດສັງລວມຂອງປະເທດເຮົາໃນໄລຍະຂ້າມຜ່ານຂຶ້ນສັງຄົມນິຍົມ. ເປັນພື້ນຖານເສດຖະກິດຕະຫຼາດທີ່ທັນສະໄໝ, ເປັນພື້ນ
ຖານເສດຖະກິດທີ່ມີການເຊື່ອມໂຍງສາກົນຢ່າງເລິກເຊິ່ງ, ເຄື່ອນໄຫວຕາມກົດເກນເສດຖະກິດຕະຫຼາດຢ່າງຄົບຖ້ວນແລະ ເປັນເອກະພາບ, ມີການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ ໂດຍແມ່ນພັກປະຊາຊົນປະຕິວັດລາວເປັນຜູ້ນຳພາ, ຮັບປະກັນທິດສັງຄົມນິຍົມ, ສຸມໃສ່ຜັນຂະຫຍາຍຕາມຈິດໃຈມະຕິກອງປະຊຸມໃຫຍ່ ຄັ້ງທີ XI ຂອງພັກ ຕາມທິດ: “ນຳໃຊ້ຊັບພະຍາກອນທຳມະຊາດຢ່າງຄຸ້ມຄ່າ, ສົ່ງເສີມພັດທະນາທຸກທ່າແຮງບົ່ມຊ້ອນ ແລະ ທ່າແຮງທີ່ມີຢ່າງສົມເຫດສົມຜົນ ເພື່ອຂະຫຍາຍໃຫ້ເປັນຂະແໜງການຜະລິດ ແລະ ບໍລິການທີ່ເປັນປາຍແຫຼມ ຮັບປະກັນການເຕີບໂຕທີ່ມີຄຸນນະພາບຕາມທິດສີຂຽວ ແລະ ຍືນຍົງ; ສົ່ງເສີມວິສາຫະກິດພາຍໃນໃຫ້ຂະຫຍາຍຕົວ ແລະ ເຂັ້ມແຂງ; ປະຕິຮູບລັດວິສາຫະກິດຢ່າງຈິງຈັງ ໂດຍກຳນົດແຈ້ງ ແລະ ປະຕິບັດຢ່າງເຂັ້ມງວດຫຼັກການຈັດຕັ້ງ ແລະ ເຄື່ອນໄຫວທີ່ຮັບປະກັນການປົກປ້ອງຊັບສິນຂອງລັດ”. ໃນການປັບປຸງກົນໄກການພັດທະນານັ້ນ ພັກປະຊາຊົນປະຕິວັດລາວ ໄດ້ອອກມະຕິເລກທີ 05/ຄລສພ ໂດຍກຳນົດຈຸດສຸມ: “ເພີ່ມທະວີການຄົ້ນຄວ້າ, ວິເຄາະ, ວິໄຈ, ກະກຽມບັນຫາສຳຄັນຈຳນວນໜຶ່ງ ເພື່ອເປັນພື້ນຖານໃຫ້ແກ່ການປັບປຸງລັດຖະທຳມະນູນ, ກົດໝາຍ, ລະບຽບການ, ລະບອບກົນໄກ, ກົງຈັກ, ການຈັດຕັ້ງນຳພາ, ຄຸ້ມຄອງຂອງພັກ ແລະ ລັດເຮົາ ໃຫ້ສາມາດຕົກລົງຮັບຮອງ ແລະ ນຳເຂົ້າສູ່ການຈັດຕັ້ງປະຕິບັດ.
2). ສ້າງການຫັນປ່ຽນອັນເປັນພື້ນຖານໃນການດຶງດູດການລົງທຶນຈາກພາຍໃນ ແລະ ຕ່າງປະເທດ ໂດຍອີງໃສ່ຈຸດພິເສດ ແລະ ທ່າຂະຫຍາຍຕົວໃໝ່ໃນການພົວພັນດ້ານເສດຖະກິດ-ການຄ້າໃນໂລກ. ສຸມໃສ່ສ້າງການຫັນປ່ຽນໃຫ້ແຂງແຮງໃນດ້ານດຶງດູດການລົງທຶນ, ສືບຕໍ່ປັບປຸງນະໂຍບາຍ, ລະບົບກົນໄກຄຸ້ມຄອງເຂດເສດຖະກິດພິເສດທີ່ມີແລ້ວ ເພື່ອສົ່ງເສີມ
ໃຫ້ມີການລົງທຶນພື້ນຖານໂຄງລ່າງອັນຈຳເປັນ ແລະ ສ້າງເປັນບັນດາເຂດຕົ້ນຕໍດຶງດູດການລົງທຶນແບບມີຈຸດສຸມເຂົ້າໃນການຜະລິດ ແລະ ບໍລິການ; ແກ້ໄຂບັນຫາຫຍຸ້ງເຫຍີງອືດອາດໃນການພິຈາລະນາໂຄງການລົງທຶນ ກໍຄືການຄຸ້ມ
ຄອງການລົງທຶນໃຫ້ມີຄວາມໂປ່ງໃສ, ວ່ອງໄວ, ໂລ່ງລ່ຽນ ແລະ ເປັນລະບົບຮັດກຸມ ດ້ວຍການຫຼຸດຂອດບໍລິຫານທີ່ຄຸມເຄືອ, ປັບປຸງພື້ນຖານໂຄງລ່າງຂໍ້ມູນທີ່ອຸດົມສົມບູນ, ການສະໜອງແຮງງານໃຫ້ແກ່ໂຄງການລົງທຶນ, ສ້າງຄວາມສະດວກໃນການເຂົ້າ-ອອກເມືອງຂອງນັກລົງທຶນຕ່າງປະເທດ. ພັກປະຊາຊົນປະຕິວັດລາວ ໄດ້ອອກມະຕິ 04/ກມສພ ໂດຍສຸມໃສ່: “ປັບໂຄງສ້າງການລົງທຶນຄືນໃໝ່, ຍົກສູງປະສິດທິຜົນການລົງທຶນຂອງລັດ, ສຸມງົບປະມານເຂົ້າໃນບັນດາໂຄງການຈຸດສຸມ ເພື່ອແກ້ໄຂບັນຫາການພັດທະນາຂອງຊາດ… ສ້າງເງື່ອນໄຂສະດວກ ເພື່ອດຶງດູດການລົງທຶນຂອງພາກເອກະຊົນ ແລະ ການລົງທຶນໂດຍກົງຈາກຕ່າງປະເທດ”.
3). ສ້າງກົນໄກເຊື່ອມໂຍງ, ເຊື່ອມຈອດໃນພາກພື້ນ ແລະ ສາກົນ ບົນຈິດໃຈເອກະລາດ, ເປັນເຈົ້າຕົນເອງ, ເພິ່ງຕົນເອງ, ສ້າງຄວາມເຂັ້ມແຂງດ້ວຍຕົນເອງ ເພື່ອອຳນວຍຄວາມສະດວກໃຫ້ແກ່ການຜະລິດ, ການບໍລິການ, ການຄ້າ ແລະ ການລົງທຶນ. ສ້າງເງື່ອນໄຂ, ຄວາມເຊື່ອໝັ້ນອັນໜັກແໜ້ນໃນການຍາດແຍ່ງ ແລະ ຮັບເອົາການສະໜັບສະໜູນ ຊ່ວຍເຫຼືອຈາກເພື່ອນມິດຍຸດທະສາດ, ເພື່ອນມິດສາກົນ ບົນພື້ນຖານເສີມຂະຫຍາຍເນື້ອໃນຈິດໃຈມະຕິກອງປະຊຸມໃຫຍ່ ຄັ້ງທີ XI ຂອງພັກ ຕາມທິດ: “ເພີ່ມທະວີຄວາມເປັນເຈົ້າການປະຕິບັດການພົວພັນກັບຕ່າງປະເທດ, ສ້າງເງື່ອນໄຂສະດວກ ແລະ ນຳ
ຜົນປະໂຫຍດຕົວຈິງໃຫ້ແກ່ການພັດທະນາປະເທດຊາດ”. ເອົາໃຈໃສ່ພັດທະນາວິທະຍາສາດເຕັກໂນໂລຊີ ແລະ ນະວັດຕະກຳເຂົ້າໃນການຜະລິດ, ການບໍລິການ ແລະ ການຄຸ້ມຄອງບໍລິຫານລັດໃຫ້ເປັນຮູບປະທຳຫຼາຍຂຶ້ນ, ຫັນເປັນດິຈິຕອນໃຫ້ສົມບູນແບບ ເປັນຕົ້ນສ້າງເສດຖະກິດດິຈິຕອນ, ສັງຄົມດິຈິຕອນ ແລະ ລັດຖະບານດິຈິຕອນ ເພື່ອແນໃສ່ຊຸກຍູ້ສົ່ງເສີມການເຊື່ອມໂຍງເຊື່ອມຈອດທີ່ມີປະສິດທິຜົນ. ຖືເອົາການເຊື່ອມໂຍງ, ເຊື່ອມຈອດເປັນການເສີມຂະຫຍາຍສາຍພົວພັນຮ່ວມມືຫຼາຍທິດ, ຫຼາຍຝ່າຍ, ຫຼາຍລະດັບ ແລະ ຫຼາຍຮູບແບບກັບນາໆຊາດຢ່າງມີປະສິດທິຜົນ, ນຳເອົາຜົນປະໂຫຍດມາໃຫ້ແກ່ປະຊາຊົນ ແລະ ປະເທດຊາດ./.
ສຈ.ປອ ກິແກ້ວ ໄຂຄໍາພິທູນ*
* ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ ແຫ່ງ ສປປ ລາວ.
(ວາລະສານອະລຸນໃໝ່ ສະບັບປະຈຳເດືອນມີນາ ປີ 2025)